تاليها قائدنا الذخر مرعوب خاتله ابجحر

چان الذخر چان العضد

والكل اله طشت ورد

وگامت تحييه من بعد

ومنهم تفداه بالعمر

تاليها قائدنا الذخر **************

منهم يلقبونه البطل

ومنهم يغسلوله الگطل

ومنهم اليضرب له ابرمل

شيخو علينا ابهالعصر

تاليها قائدنا الذخر *************

گالوله ياسور الوطن

ياجبل ماتهزه المحن

انت ذخرنا ابهالزمن

نتغنى بيه صبح وعصر

تاليها قائدنا الذخر **************

نفخوه مثل نفخ الرفش

خلوه تربع عالعرش

مفلس وماعنده قرش

والعوجة تشهد عالزفر

تاليها قائدنا الذخر **************

صوروه مفكر للحزب

وحطو اقواله ابكل درب

ابكل ساحه اله صورة ونصب

ابكل الجرايد ينذكر

تاليها قائدنا الذخر **************

ابكل الجرايد صورته

وبكل مقالة سيرته

اولو فد جريدة اتناسته

تنطمر ماالهة ذچر

تاليها قائدنا الذخر **************

وصفوه وصف ماينوصف

ومدحوه مدح ماينعرف

ودخلو اسمه ابكل حرف

اسمه انكتب سطر ابسطر

تاليها قائدنا الذخر ***************

گالوله قعقاع العرب

ضرغام فارس لو غضب

وسيفه بعد يشطب شطب

تشهدله بدران ومظر

تاليها قائدنا الذخر ***************

القابه ماالهة عدد

وكل يوم طالع له ابسند

ماشاالله بليه حسد

كل يوم الهامه يدر

تاليها قائدنا الذخر ***************

هم فيلسوف ومقتدر

فنان مبدع مبتكر

القابه ابد ماتنحصر

ولو ردت تحصيها اشكثر

تاليهاقائدنا الذخر ***************

سووه جبل شامخ قوي

واذراعه ابد ماينلوي

واللي يعارض ينچوي

لو سجن لو ضمه الگبر

تاليها قائدنا الذخر ***************

شگد چان مرعب هالاسم

امن ابعيد منه ننهزم

ولونمنا شفناه بالحلم

كابوس جاثم عالصدر

تاليها قائدنا الذخر ****************

چان العجب مايعجبه

وتاليها ربك دولبه

وداله بوش ايحاربه

وضاگت عليه من كل كتر

تاليها قائدنا الذخر ****************

ضاعت اخبارة ولا ذچر

منه ولا طارش يمر

چا وين قعقاع النمر

شو چنه شارد منكسر

تاليها قائدنا الذخر ***************

راحت ايامه وهيبته

وشهور صارت غيبته

حتى اهل بيته وديرته

ماجاالهم منه خبر

تاليها قائدنا الذحر ****************

اهله فلا لمهم سگف

كل واحد ابديرة انگطف

والمات منهم ماانعرف

ذابو مثل نگطه ابحر

تاليها قائدنا الذخر ****************

گالو يقاوم مايمل

ومايتعب ابيوم ويچل

معلوم معروف الاصل

مالحگ ابجلده يفر

تاليها قائدنا الذخر ****************

گالو الفلوجة اله

الانبار صاحت له هله

وتكريت نادت بو حلا

شو تالي عافوه يحتضر

تاليها قائدنا الذخر ****************

وسامراء والعوجه بعد

گالوله انجدد عهد

وياك احنه وللابد

لنه طلع نتر بنتر

تاليها قائدنا الذخر ****************

وراحت الايام اوجت

وقعقاعهم مخفي تحت

يابو بشت بيش ابلشت

چن فارة صاگرهة نسر

تاليها قائدنا الذخر ****************

گادوه مثل گود الطلي

ولحيته مليانه حلي

لامن معين ولاولي

مخطوف لونه امن القهر

تاليها قائدنا الذخر ****************

مستسلم وبايگ هوا

وبحفرة مابيها ضوة

محروم من شم الهوى

مذلول دايخ منسطر

تاليها قائدنا الذخر ****************

يكفينا هالمنظر تره

ونسينه كل اللي جره

فرحتنا تبگه امعمره

من راحت ايام التفر

تاليها قائدنا الذخر مرعوب خاتله ابجحر

 

 

ابو مرتضى البهادلي

25/12/2003

كوبنهاجن دنمارك