|
هضم عمري خلص لوعات ومناطر ليالي طوال حد ماتخلص الشده هضم ضاعت ليالي اطوال مليانه حنين وشوگ لوعات وموده وطيب حد ما طالت المده وظل يجري قطار العمر بالحسبات وضيعنه ابمحطاته البعيده اوراح وتعده اوتهنه ابين بحرين البعد والشوگ وضعنه ابزحمة الايام ضعنه وما بعد رده وتلاگفنه دهر غدار ضيعنه ابمتاهاته واخذنه ابعيد شتظن ياصاح هم ينعاد عمر اللي جزه حده وظلينه بامل چذاب عشنه اسنين يوم بيوم منتظرين والايام تتعده وتولتنه الليالي وجارت الايام احزان ومشقه وجور ذوبنه الزمان وطالت الوحده وترافجنه الطريج اذياب مسعوره وكواسر ليل وتيهنه الدليل الماوفه ابوعده وگضيناها سهر وحساب صفنات ونحيب ونوح وبعد لوعات ممتده اولا مرة الفرح مرنه وتلگيناه ولا فارگ عمرنه الحزن لو هده ويمر الليل عدنه وتنگضي الساعات بالحسبات حسبه اجيب حسبه اتودي حسبه اتذوب الچبده ولو يطلع نهار اليوم ما يفرق تساوه الليل عدنه اويه النهار اوضاع چا شنه ابنهار الما ضوه ونده وچا شنه ابليالي اللي گضن صفنات وچا شنه ابربيع المازهر ورده وچا شنه ابسنين البيها احنه ابعاد حد الموت وگضينه العمر بالجزره والمده وچا شنه ابزمان المارحمنه وسار بينه ابجور فارگنه وجرحنه ولارحم عنده وظلينا ابمحطات البعد وسنين مرت حيف اوصفن كل الليالي اعلينه متحده وتناثرنه ابشتات وغربه ماتنقاس وفرينه الدروب المالهن نشده وتلاشينه وتجافينه ابمتاهات الهضم لوعات لوعات وانين ونار مشتده وتعادينه الليالي وتسخر الايام والاقدار وتخضخنه المنافي وتاخذ الزبده هضم صرنه حليب اشنان ما يراد اوصفه اوشاله العمر مابيه بعد هده شخبرنك ياصاح العمر ماينعاد لاهيهات هيهات اتشافه اعيونه الرمده اومضت بينه مضت بينه الليالي تسير حد السير منة غربه البعد لاشواگ لواهات ماتهده ورحل بينا رحل بينا قطار البعد والنسيان ومشه بينا ابسچچ كلفات ضاع العمر وتبده وضاعت كل حلاوة شوگ كل بسمة فرح عدنه وچذب نضحك صفينه ونظل نتحده وظلينه ظلينه نكابر والعمر شوغات اثر شوغات انتلاوة اويه المنايا وليها نتصده وتظل دوم المنايا اتعيل بينه اهواي ويطابجها الزمان ايعيل وبعمده لچن يخسه الزمان اشما يريد ايجور خله ايجور مايخلص صبرنه ابزود نتعده وتعودنا اعلى لوعات الزمان الطابجتنه ارداف بصبرنه المانفذ حلينه كل عقده
مع تحيات ابو مرتضى البهادلي 10/3/2004 كوبنهاكن الدنمارك
|