|
شسولفلج يايمه العمر حسبات خلص غربه ومذله وضاعت اسنين شسولف من سرى الحداي بالليل اوصفه ضعني غريب اويه المضعنين احس روحي بكت وياكم اهناك اوجسمي اويه الضعن يم المحربين وسرى بينا الضعن خطوه اعلى خطوات وبكل خطوه انخطت انت اتوارين اولا مرة خيالج غاب لحظات احسج بالنفس لو غمضت العين سرحت ابلوعة امصابي اعلى فركاج ولاادري الضعن منواه لاوين ولا ادري العمر يراد لولاج وهم عود الوكت يصفالي بعدين وهم يهنالي عيش ابهضم فركاج وهم تنعاد كعدات الصواوين وانت بامل عشتي العمر وسنين عينج عالدرب كل يوم تربين ونذرتي انذور لو عادو الغياب وصمتي اشهور لعيون المحبين وبذلتي الروح كلهة ابفكد الاحباب وسرتي اعلى الدرب كل يوم تنطين اولامرة بخلتي وكلتي بس عاد روحج مو الج ياحبيبه تدرين وتنخيتي ابعلي حامي الحما اهناك اوتوسلتي ابرضيع الطف والحسين وحشمتي السكن بغداد والنوب السامرا تعنيتي اوتعتبين او لبو فاضل بعد دكيتي الباب اشما دام العمر جنتي اتعنين وطلبتج ياعلي تحفظ الغياب وترد اللي علي صارو بعيدين وبجيتي ادموم من عافوج الاحباب تذوبين الصخر لمن تونين وانه ابلياج ضايع بين الايام من بعد البعد من زين للشين من هضم لهضم من شوك لعتاب من لوعه لسكم لفراك طيبين وتكلبنه الليالي وتقسي نوبات ويجافينا الزمان ويوجر البين وظلينه انتكالب ويه الايام وتمر حسبات تسلبنه المضامين وتذوبنه المنافي وتترك اثار وتحطنه ابقالب المنبوذ صوبين وتصورنه بشر مسلوب الاحساس معدوم الاراده ابوسط نارين شريد اوصف يايمه اشكثر لوعات شكثر اهات اثار ونياشين شكثر عصرات موته باثر موتات شكثر دمعات سالت مثل نهرين شكثر حسرات مرت بين الايام شكثر جلمات تاهت بالعناوين وبعد اكثر يايمه العمر لوفات شيعيده اومضت حفنات السنين شيعيد الليالي وبعد هيهات تعود ايامنا اشواك ورياحين السوالف ما كضت ياحبيبه بس عاد اجيب اللي يواسي ويسمع امنين وتظل بالصدر ويه النفس عبرات اتكسر تمرد الدلال نصين وتشوغ الروح نوبه وتشب نوبات ويرف الكلب من طاريكم ايحين شكثر وسط الكلب محبوسه جلمات قصص احلام اشعار ودواوين اياحبيبه اختصر واوصفلج الصار ابكل يوم احتضر مو مرة مرتين وطلبتي ابهالعمر لو حان الفراك اكون اندفن يم حامي المطاعين
ابو مرتصى البهادلي 16/2/2004 كوبنهاكن دانمارك
|