|
عراق المحبة / مونولوج يبحث
عن ملحن
خلدون جاويد
شرفوني وسجلوني من مواليد العراق
ما أريد اتورطوني بعد باحزاب ورفاق
للوطن يحله انتمائي والعشق ارضي وسمائي
والمسله . ونخل دجله والفجر و الانطلاق
**********
بيد وحده بالتضامن والتكافل والعمل
لا منافي لامهاجر لاتناحر لاجدل
الشعب راسم طريقه بغصن وبرعم أمل
ايريد تجميع الكلوب ومايريد الافتراق
**********
امنيات الشعب قانون ومواثيق وأمان
ويارفاق انريد معهد علم ايخرّج انسان
بعد منريد النميمة والكتابه على فلان
قرقوش انزال حكمه من جزيرة واق واق
***********
اكتب اسمي بكل محنه على مي دجله وفرات
واشتل العينين ينبوعين للحب والحياة
بالتكاتف والتآلف تسقط احلام الطغاة
وبالمحبه بلا حدود يلوح فجر الائتلاق
************
والعلم ابلا محطه انطير له من كل مطار
ليش تنفيني ابجزيره اتكلي ممنوعه الافكار
الخليقه كون واسع لا حدود ولا اطار
لا فئة اتكلبج اد يّه وطائفه تشد الوثاق
*************
العراق ايريد بيت ومدرسه وحب وامل
مايريد الوهم يحكم ايريد ميدان العمل
لا اكاذيب السياسه ولا شعارات وغزل
يريد مجلس حكم واسع لو مسار الفكر ضاق
***********
الأمس بلواته بلوه خلي نتحزّم الباجر
الحضاره ألف خطوه بدرب مستقبلي الزاهر
بالعقل مو بالوساوس بالعمق مو بالمظاهر
مبدأي الانساني يعلن ديموقراطيه ووفاق
***********
شعب نحو القمه صاعد مشعله بكل سفح صامد
والمحبه ترس كلبه تضوّي دربه الله شاهد
لا تميزوني على اخوتي شعبي روح بجسد واحد
شعبي عقليه نبيله وخلق وذوق ومذاق
***********
بالكفاءة والفضيله والجداره والجهود
ينال ابن البلد حقه وبالفهم يثبت وجود
دولة الدستور تحكم والقوانين التسود
بالقمامه والندامه سقط عهد الارتزاق
**********
بدل ما نسجن الوادم نفرش الشارع ازهار
وبدل ما انخاصم بعضنه جار يسأل على جار
وبدل ما انهجج ولدنه بالالوف بكل مطار
لازم انشد من أزرنه بالتصافح والعناق
*************
بالسلام الاجتماعي والتسامح والعلم
نحل قضايا الاختلاف بألف صيغه وننسجم
احنه اديان جثيره انصون حبهه بالسلم
واحنه للاعراق مجلس لأشرف وأطيب اعراق
***********
\ مونولوج يبحث عن ملحن
|
